Stjepan Vitez

LADETINA                   2022.god

Štef je išel s prijatelom na jedne. Posle prve por kupic bil je črlen, a onda je bil i pomalo drven. Da ga nebi beciklin itil, on ga je španceral. Bil je zmučen i pomalo ošamučen. Navrnul se k kume, da bi si malo počinul.
Kuma mu je rekla: Kumek! Si nekak dobre vole. A... dej mi mira. Ne znam jel bi te ponudila s čem il s ničem.
Dej kuma tek tuliko da si jezek smočim.
Dobro kume, al ti nekaj moram povedati, jel me to pri srcu tišči. Reči kuma moram prijeti ono kaj me ide.
Kumek! Tvoja Barica bi tebe dola sve na svetu, a kak si je ti vrnul?
Ne znam nokaj cilaš? Navek ti je se za volu naredila, a kad ti ni jenput ladetinu skuvala, kaj si je rekel?
Se ne sečam.
Kumek, kumek, si je rekel: Kurva jedna, nisi mi skuvala ladetinu.
Bil sem valda pijan, pok mi zletelo.
Kumek moj drogi. Govorili su je otec i mati, da se ne ženi s tobum, da ju neš poštuval, a imala je prilike i prilike. Bila je bogata i najlepša dekla. Rekla je da ona ide samo za svojega Števeka ili bu ostal stora dekla. Znola mi je reči kuliki su je se nudili, pok i doktori. Sem je v šole rekla: Kuma onda kaj šporaš najne, pok dej. Rekla je: Rajši bi mrla, nek svojega Števeka prevarila.
Kak si je ti vrnul? Jel imaš sroma i pameti? Na koleni bi trebal iti na Bistricu i dobro se spovedati, a onda ženu prositi za oprost.
Štef je zdehnul, sproznil kupicu, obrisal suzu i rekel: Kuma fola ti na svemu, jo sad idem.
Ni zajašil na beciklin, nek ga je i dale rival.
Koraki su mu bili žmefki i uprov se treznil i študeral, kaj mu je rekla kuma. Čem bliže domu, bil je se bole turoben. Kaj sad žene reči. Kuma mu je otprla oči i sad je videl zokaj se Barica vu se povlekla, zokaj se više ne smeje i zokaj samo zdihova.
Došel je na dvorišče i onda ga je nekaj v nos pogodilo. Se je dišalo po ladetine. Došel je f hižu, kak da je na smrt osujen. Jedva je pozdravil.
Si gloden, ga je pitala Barica.
I jes i nis.
Dela je prejdnega zdelu z ladetinom.
Rekel je: Baš mi bu pasalo, da me oladi.
Rekla mu je Barica: Ječ, ječ, mili Števek. Da Bog do, da bi te za navek oladela.
A onda je odjundala v sobu, hitila se na postelu, zabila glovu v vajnkuš i hincala je milem plačom.